賀一誠反擊高天賜勿打擊公務員士氣

【本報訊】直選議員高天賜 (澳門公職人員協會理事會主席) 再次指稱公務員士氣低落。行政長官賀一誠回應，公務員在疫情中一鼓作氣，作出很大貢獻，完全不認同他們沒有士氣。他希望，高天賜不要把部份公務員有怨氣，說成三萬五千公務員士氣低落；否則，如同一棍打擊全部公務員，令他們傷心。

在昨午的施政答問中，直選議員高天賜提出，公務員士氣處於歷年最低。續稱：「當局將問題掃到地毯下，充耳不聞。」行政長官賀一誠回應時直言：「喺呢度已經聽咗十年喇！一樣嘅嘢！冇咩大改變！十二年嘅士氣，同樣你都係講咁低落喇！我已經聽慣咗！但係唔係唔理，唔會掃去地毯下面！」

賀一誠表示，從三次「全民核檢」、全天候由香港機場接送澳門居民回來都可以看到，公務員首當其衝，他們一鼓作氣，作出很大支持、貢獻，令他感動及感謝。並問高天賜：「咁嘅公務員隊伍，你仲話佢哋士氣低落？我諗法唔可以同你一樣。你係打擊面太大喇！你咁樣好傷公務員嘅心！」

賀一誠坦言，本澳有三萬五千公務員，一定有參差，不會是每一個公務員都士氣高昂；但是，每一個公務員盡其本份，才可維持公共服務。他提出，沒有士氣的貶意詞是不作為；續表明，完全不認同公務員沒有士氣、不作為。並向高天賜稱：「我希望你唔好再咁樣打擊公務員！」

賀一誠進一步提及，在大風大雨下，把大廈內的居民撤往酒店隔離；續問：「邊個去做？唔係你高天賜議員去做，都係公務員去做！」他表示，不要把部份公務員有怨氣，說成三萬五千公務員士氣低落。並向高天賜稱：「你作為公職人員協會嘅代表，你一棍子將公務員所作出嘅貢獻全部打低！」

高天賜又提出，長者要連續兩年忍受政府不向中央公積金注資七千元。賀一誠稱：「我哋唔係想刻薄老人家。我哋真係想畀佢哋，但係法律鉗制住我，我唔可以做呢件事。邊個夠膽去違法？你 (高天賜) 又話要問責！我叫財政局局長去違法？注資七千蚊，佢法律依據喺邊度嚟？到時你指責財政局局長要落台？」

賀一誠重申，兩年不注資七千元真是法律問題；當出現盈餘時，將會立即注資。並稱「一定要依法施政。我係呢度同老人家講聲對唔住。但係，真係冇辦法；因為，呢個係法律，係在坐咁多位舊嘅議員都有份投票，都係贊成。今日你哋又話呢樣唔得，嗰樣唔得，點解之前唔考慮清楚啲？」

對於高天賜提及有居民在境外購置物業受騙，賀一誠回應，已要求消費者委員會管制，不允許沒有齊全證明的境外物業在澳門刊登銷售廣告，連中介都要清晰相關規範。他透露，很多報業人士投訴少了每個近十萬的廣告。並稱：「有啲社團開某某某投資會，都係好多人受欺騙。咁點呢？我哋只能行法律程序。」

回應高天賜的問題後，立法會休會半小時。隨之，與高天賜一同參選的直選議員謝誓宏 (澳門公職人員協會理事會副主席) 再次提出公務員士氣問題，賀一誠稱：「我已經回應高天賜議員，唔再重複。我都係同樣觀點，冇改變；唔會食完一個下午茶就改變。」