捐出三兩‧助弱扶貧

蓮花地，昨報喜，蓮花尊者，大聲宣布，太公分「豬肉」，再斬「三兩」。阿茂又做餅，建議立基金，達官、貴人，全捐贈金，敬老、扶幼，助貧。 蓮花尊者，昨上「木人巷」，與各高人，再來「較量」，「拳來腳往」間，尊者發「絕招」，即時宣布，太公祠堂，為「擋」通脹，在下半年，再派「三兩銀」！這一喜訊，逗得蟻民，大為興奮，阿茂聞訊，也讚「師爺九」，今回確「高招」，簡單一句話，係適當時間，做適當嘢！ 此話何解？因為「陽光祠堂」，近呢一排，唔多「陽光」，激起民火，慢慢升溫，通脹海嘯，洇湧蓋來，民心已慌，既慌且怒，正待時機，乘勢爆發，「五‧一慣例」，危險之期，此時洒「水」，有如核電廠「降溫」，可緩解一陣，師爺此計，可「贏」勳章！ 阿茂興奮，賀爾蒙驟增，內分泌紊亂，立時內急生，遁入茅廁內，痛快淋漓間，人「急」「智」生，閃出絕世「橋」，公諸於世造「福」萬民！ 祠堂今次派「三兩銀」，有個特別說明，為咗紓緩通脹，特別「一次性」補助，唔係派開有鋪癮，叫D蟻民，以後唔好，收到好似奉旨咁，無謂發白日美夢！ 阿茂諗諗吓，三兩銀齋對於蟻民，唔算少，對於達官、貴人，卻唔算多，做薑唔辣，做醋又唔酸，正如大炮馮話齋，都唔夠賭一鋪！對於乜奶物太，更唔夠買個名牌銀包仔，可能連做一次「飛素」拉面皮，亦都掹掹緊，如果趙公子，用嚟請多情女食燭光晚餐，都氹唔到嗰靚女開心，所以話，對於達官、貴人，要嗰三兩銀嚟做乜，簡直係多餘。 基於以上充分理據，阿茂度出絕世好「橋」，既然蓮花尊者聲明呢D銀兩係用嚟做「生活補助」，呢D銀兩對啲達官、貴人又冇乜幫助，不如請啲達官、貴人，將呢啲銀兩捐晒出嚟，好似隔離埠超人李咁慷慨，講明全家都捐，成立基金，用嚟敬老、扶幼，紓解貧困，咁就蟻民稱允，功得無量嘞！ 阿茂