公轎與私轎

管轎衙門，日昨又打攞，話要聽吓各方父老高論，希望大家幫手，諗吓「計仔」，搞好將來十年後蓮花地啲轎務。 先聽吓「轎」老爺點打算，佢話有三度板斧，先畀心機，更「谷」重銀兩，搞好啲公共轎，將來由佢地做主角，啲蟻民出街，盡量要坐公共轎，養私家轎「皮費」，將來就要越嚟越貴嘞，隱約聽出，弦外之音，大老爺未來夢想，就係要坐私家轎身價，慢慢趨向「貴族化」。如果「夢想」成真。蓮花地啲蟻民，未來住、行條件趨勢，可能就要「屋」越住越細，轎越坐越「大」。 蟻民聽到呢啲「高論」，真係唔知好笑定心寒。好笑者，「高論」有本末倒置之嫌。因為依家蓮花地，啲轎「枱」得越來越慢，塞轎塞到亂哂龍，主要原因，就係啲轎道越嚟越窄。道邊又被官家佔用嚟停轎，轎「枱」其間，左避右避，想抬快啲都幾難。另一方面，啲衙門為咗多收D銀兩，亂咁放轎，又唔相應增加啲停轎場，嚟安置啲轎，慳水慳力，搞到啲轎道買少見少，塞轎越塞越厲害，始作俑者，就係班老爺。 再者，轎衙門啲老爺諗嘢都幾「勢利」，好鍾意「拜金」，即使幾難得整啲通轎設施出嚟，大多集中係「貴族區」同吉祥賭坊一帶，呢西區啲天橋同隧道等通轎設施，唔止做得靚，甚至多到供過於求，但係喺「蟻」民區，甚至中產區，就唔多見，充份顯示出，啲老爺成日諗，只係啲「大老勢」同「上頭」需要方便，星斗蟻民，啋你都傻！真真正正以「銀」為本！ 重有一樣蟻民失望係，橋老爺成日發表偉論，滿腹大計，但講出嚟，「美夢」成真，預算往往，需時起碼都五到十年為單位，等佢美夢成真，真唔知要換咗幾多個祠堂。 需知道，遠在天邊，龍的故鄉，發展高鐵，行通龍地，進展成為全球高科技轎大哥大，計劃到建成，都係幾年光景。蓮花地內，天下第二大建築物，威尼斯酒店，碩大無倫，由計劃到落成使用，亦係兩、三年間，點解人地可以做得咁快，而「豆腐潤」咁細既蓮花地，想開條公共轎道，安置好道邊啲轎仔，竟然預計要花成五載咁耐，整多幾個停轎場，計劃重話要十載，先可以實現，真係慢得可憐，乜嘢叫做「急市民所急」，蓮花地唔係冇錢，做嘢咁慢，非關係錢，而係病在老爺觀念。唔通要啲父老，伸長條頸，遙望「彩虹」，直到立下遺願：「家祭無忘告乃翁」!?先至搞掂？呢一方面，蓮花地老爺，向來表現，可能係世界「領先」！ 阿茂