一字記之曰蠢

蓮花地，真可愛，稽查「怪招」，「聰明蠢計」，陸續咁來，睇到蟻民，苦叫「善哉」。 話說蓮花地，唔知點解，近日烽煙四起，自稱「冇工開」班蟻民，三五約埋，走去「手作仔」衙門，要見「大老爺」申冤，又唔知點解，「大老爺」又咁啱得咁橋，唔係衙堂，班「蟻民」乘機發難，衝門又瞓地，攪到差大哥都要出嚟執手尾。 「手作仔」大老爺見勢色唔對，人急智生，吩咐班手下，做番幾場「好戲」。於是出其「大差」，到各大「作坊」，搜查「搶飯碗」啲兄弟。 班「衙差」出動時，係威係勢，去到大老細啲「作坊」做嘢，卻突然變得好「斯文」。竟然擔張椅仔，叫啲彪形大漢出嚟，排好隊仔，方慢慢查「身細」。後欄雞飛狗走，就冇眼睇。 呢一做法，等如叫個阿SIR，坐係新馬路口或者噴水池也，佛口婆心，叩問路人，邊個嗦過Ｋ，或撩過女仔，自己行出嚟，招認一切，交心撫肺，以免問心有愧。呢一招，若果行得通，只有一可能，就喺禮拜堂內，或教堂之中，全世界人，信晒耶蘇，都變教徒，心靈蕩滌，純過蒸餾水，正氣過龜靈膏，稽查之事，方能真做到。 可惜嘅係，唔知點解，又係咁啱得咁橋，係「手作仔」衙差大演功架之時，「公仔箱」嘅「時聞妹」走去「八掛」，竟然俾人兜搭，請靚女做「臨記」，頂替做「正印」手作仔。 「時聞妹」貞烈過聖女貞德，正義凛然，係「公仔箱」爆咗套「戲軌」出嚟，俾全城父老睇好戲，更兼免費。 「大老爺」大為冇癮，激氣上嚟，隔山呼召，頂證者出嚟！佢又忘記咗，「公仔箱」啲時聞故仔，邊過經手，嗰名都會講出嚟，有名有姓，還需頂證。咁清楚都查唔到，難怪佢「衙門」班兄弟，經常阿茂做餅，「見身郁唔見米白」，也難怪「大老爺」也自嘆，明知「蠢計」，亦要經常「砌」。 ‧阿茂‧